PASSEJADAS par Aimé Tastaire
Illustration : Didier Gallien, promenade du côté de Fontanes de Causse.

Ai caminat suls sendièrs de nòstre causse salvatge, seguent dins los bòsques de tèrmes escarpats d’ont salhisson, d’una tèrra secarosa, la ròca mossuda, emai, çai e lai, las raices tòrtas dels garrics, mèstres d’aquels luòcs. Los aglans crican jols pès, d’unes còps, n’i a un, malintencionat, que me tomba sul cap per me remembrar benlèu qu’aicí es chas el e que ieu soi pas qu’un passatgièr.
Ai escalabrat nombroses paredons de pèiras secas que s’arroïnan, desmargats a mesura que lo temps passa e esfaça çò que los vièlhs an bastit a pro pena.
Darrièr, pels prats dempuèi tan de temps despeirats, se pòt veire qualques còps un tropèl de motons o de fedas abandonadas sus una èrba escassa, mas que sufís a lor bonur.
Arrucada dins un caire, una casèla ventruda, cubèrta de lausas, velha, soleta, tristoneta, esperant la pastorèla que jamai tornarà pas !
Ai trencat d’èrmas embartassats ont las cauças s’esquiçan mai d’un còp pels romecs que vòlon pus vos daissar partir, tanben de pèças envasidas pels genibres agarrussits o las genèstas picassadas de floretas rossèlas, com’autant de pampalhetas d’aur, fòra qu’aquelas van pas enriquir lo proprietari d’un endrech que se moris dapasset.
D’unes còps, me soi perdut, pautrissant e bracejant dins de falguièras que me passavan per dessús lo cap, trebucant per de socas d’una vièlha vinha qu’aviá benlèu, i a bèl temps, entendut los cacalàs joioses de joves vendemiaires.
Ai landrejat, al gost de ma fantasiá, agachant dos esquiròls se picanhant a la perseguida l’un de l’autre, virolejant sul pè d’un brave castanhièr .
Ai panat en camin de noses tombadas dins los valats, oblidadas pel païsan ; un còp dubèrta, ai pas res vist de çò que cantava lo Charles Trenet, alara…las ai cruscadas sens la mendre rependida.
Ai tressautat quand jols pès, la serp o lo lusèrp fugissián subte, tant espaurugats que ieu, per s’enanar escondre jos una pèira aparaira.
Urosament, d’encontres aital se fan pas sovent, e aprèp tot, se pòdon trobar en vila de las bèstias salvatjas…mas an doas patas aquelas !
Anem ! val mai se passejar pel campèstre per oblidar los embèstiaments de cada jorn, per gostar la patz e la tranquillitat, quand, plan segur, i a pas tròp de còps de fusilh : PAN ! un còp…mancat ! PAN ! Dos còps…mancat ! e lo singlar que contunha de córrer…e ieu de passar camin.

A.Tastaire

Revirada :

PROMENADES

J’ai cheminé sur les sentiers de notre causse sauvage, suivant dans les bois des talus escarpés d’où émergent, d’une terre aride la roche moussue, et aussi, çà et là, les racines tortueuses des chênes, maîtres de ces lieux. Les glands craquent sous les pieds, parfois, il en est un, malintentionné, qui me tombe sur la tête pour me rappeler, peut-être, qu’ici il est chez lui, et que moi je ne suis qu’un passant ;
J’ai escaladé de nombreux murets de pierre sèche qui croulent, disloqués au fur et à mesure que le temps passe et efface ce que les anciens ont bâti à grand peine. Derrière, dans des prés depuis si longtemps épierrés, on peut voir quelquefois un troupeau de moutons ou de brebis abandonnées sur une herbe rare, mais qui suffit à leur bonheur.
Recroquevillée dans un coin, une cabane de berger ventrue, couverte de lauzes, veille, seulette, bien triste, en attendant la petite bergère…qui ne reviendra jamais !
J’ai traversé des friches broussailleuses où les pantalons se déchirent souvent dans les ronces qui ne veulent plus vous laisser partir, et aussi des parcelles envahies de genévriers rabougris ou de genêts piquetés de petites fleurs jaunes, comme autant de paillettes d’or, sauf que celles-ci ne vont pas enrichir le propriétaire d’un endroit qui se meurt lentement.
Parfois, je me suis perdu, foulant aux pieds et gesticulant dans des fougères plus hautes que moi, trébuchant sur les ceps d’une ancienne vigne qui avait peut-être, il y a longtemps, entendu les éclats de rires joyeux de jeunes vendangeurs.
J’ai flâné, au gré de ma fantaisie, observant deux écureuils se chamaillant à la poursuite l’un de l’autre, tournoyant sur le tronc d’un grand châtaignier.
J’ai chapardé en chemin des noix tombées dans les fossés, oubliées par le paysan, une fois ouverte, je n’ai rien vu de ce que chantait Charles Trenet, alors…je les ai croquées sans le moindre remord.
J’ai sursauté quand sous les pieds, la couleuvre ou le lézard fuyaient soudain, aussi effrayés que moi, pour aller se cacher sous une pierre protectrice.
Heureusement, de telles rencontres ne se font pas souvent, et après tout, on peut en trouver en ville des bêtes sauvages…mais elles ont deux pattes celles-là !
Allons ! il vaut mieux se promener à la campagne pour oublier les ennuis de chaque jour, pour goûter la paix et la tranquillité, quand bien sûr, il n’y a pas trop de pétarades de coups de fusil : Pan ! un coup.. .manqué ! PAN ! deux coups…manqué ! et le sanglier continue de courir…et moi de passer mon chemin.

A.Tastaire ( Octobre 2002 )