LA TALVÈRA
Joan Bodon
Sus la mar de las galèras.

Es sus la talvèra qu’es la libertat,
La mòrt que t’espèra garda la vertat.
Cal sègre l’orièira, lo cròs del valat,
Grana la misèria quand floris lo blat.
Es sus la talvèra qu’es la libertat...

Per passar l’encisa te revires pas :
D’autan o de bisa pren lo vent sul nas,
Una pèira lisa, l’avenc es al ras.
Ont la sèrp anisa se fondrà lo glaç.
Per passar l’encisa te revires pas.

Estelas sens luna ne veirem la fin :
Ne perdrem pas una, cercam lo camin.
Lo cèl tot s’engruna del ser al matin,
La bèstia feruna pudís lo canin...
Estelas sens luna ne veirem la fin.

Fraire contra fraire tiram lo cotèl :
Enfant de ta maire que val la tia pèl ?
La mia val pas gaire : un espet de fèl.
Quin aucèl becaire nos picarà l’uèlh ?
Fraire contra fraire tiram lo cotèl.

Es sus la talvèra qu’es la libertat.
D’orièira en orièira pòrta la vertat.
La vida t’espèra de cròs en valat :
Bolis la misèria quand grana lo blat.
Es sus la talvèra qu’es la libertat...
Sont Laurenç d’ùlt, estiu de 1968.-