Texte, enregistrament et transcripcion per Joan Pascal Godonesca

Racontes reculhís al près d’ Anthony Ginibre, 1999.

Anthony Ginibre nasquèt a Sant-Jan-Lespinassa, pròche Sant-Seren dins lo Carcin, departament d’Òlt lo vint-e-quatre d’agost 1908. Foguèt paisan tota sa vida dins aquela comuna, a seissanta kilomètres d’Orlhac coma de Briva e un pauc mai de Cáurs. Visquèt dins aquèla val onte raja lo flume Dordonha en trabalhar la tèrra e en parlar cada jorn « patoès » coma disiá. Venguèt vièlh, foguèt malaude, e acabèt sa vida pauc de temps i a, al pè de sa filha a Clarmont.
Los tèxtes que seguísson son estats enregistrats al manhetofòne e transcrich segon la grafia dicha classica per Joan Pascal Godonesca, son pichon-filh.

Raconte 1 :

Pialaprat de Donat.

Pialaprat de Donat partiguèt far rire la filha del rei. En passent a la gròta de Prèsca , aval, vejèt un tipe and’un ase e li demanda : « en’ vas pialaprat ? » E çò ditz « vau a París far rire la filha del rei. » « -E mès te vòli sègre ! » « -E ben » çò ditz, « seguen-me ». Alèra davala la còsta de Prèsca, en passent a Fenon1, trobèt un can, aquí, que l’arrèsta e i diguèt : « tè ! en’ vas Pialaprat ? » E çò ditz « vau a París far rire la filha del rei. » « -Mès te vòli sègre ! » Arriba al fons del Goson1, trobèt una vaca que ela, se permenava per la rota, e li ditz « end vas Pialaprat ? » E çò ditz « vau a París far rire la filha del rei. »
E ne trobèt coma aquò tot lo long del camin. Quand arribèt a París... que la filha del rei vejèt arribar Pialaprat amb totas aquelas bèstias... s’atapèt a rire. Lo rei aviá promés que donariá sa filha end-aquel que la li fariá rire, que l’aviá jamai poscuda far rire. Aquel jorn, foguèt per Pialaprat..