LAR’ÒC En Fèsta ,
Lo temps del bilanç, lo temps dels projèctes

La 4ena edicion de « Lar’òc en fèsta, los 20 e 21 d’agost passats, sostenguda per l’IEO d’Olt foguèt pensada per Claudi Vertut de l’associacion : "Los Amics Del Patrimòni Carcinòl". Lo budget èra equilibrat e la qualitat de las intervencions foguèt de bon òrdre. Las doas jornadas debutàvan per la conferènça d’En Joan de Rigosta sus l’origina dels noms de familha. Rigosta, un dels melhors especialistas en matèria d’onomastica, captivèt plan un brave seissantenat de personas.

Per la seguida, la paraula foguèt balhada a nòstre Xavièr Vidal, musicaire e etmusicològ renommat que presentèt son camin de
cercament de las musicas de tradicion populària en Occitània. Avèm ajut lo plaser d’ausir fòrças cançons e fòrces tròces d’instruments de musica que se tròban per son albòm : "Camins de biais".

En granda serada, Xavièr s’associava a En Guilhèm de Rossilha, mèstre musicaire pel bal que recampava un brave tropèl de monde amorós de las danças tradicionalas e Occitanas.

L’endeman, plaça a la tròp polida prestacion musicala e teatrala de las "pimparèlas" amb la mesa en scèna minimosa d’En Joan Maria Arnal. Las 4 actritz e cantairas an dejà presentat aquel espectacle de cançons, danças e contes tradicionals dins nòstre païs Carcinòl. L ’espectacle traça la vida de las femnas dumpèi la
debuta del sègle XX dins tots lus atges de la vida ..

Dins l’après mègjorn, Dòna Silvia de Pullès, acordeonista e cantaira famosa, cap d’orquèstra a sas oras ricas, (2 Olympia a Paris) nos encantèt coma una fada amb son novèl concèrt de 20 cançons compausadas en Occitan. Nòstre Andriu Ròca badava nòstra Silvia coma un trobador avisa la trobairitz. (a 95 ans, èra vengut de Caors).

Joan Jacme Delmas, trobador e musicaire animèt l’aperitiu - concèrt amb Silvia e Guilhèm. Lo temps d’un grand bal en serada, nòstra Silvia Pullès fèt recaptivar los dançaires.

La mòrt recenta de Francesa Talaissat ( conse delegat de La Ròca) Aublijèt lo desplaçament d’una partida de l’evenament, cap a una autra data. (camin poëtic e musical entre La ròca e La Magdalena). "Lar’òc en fèsta" desplaçat a constans, foguèt una capitada, çò que encoratja l’associacion « Los Amics Del Patrimòni Carcinòl" a trabalhar mai e milhor.

Lèu e d’aici la fin de setembre nos tornarem trobar dins lo local de l’ Associacion prestat per la communa de La Ròca e que portará lo nom d’Ostal Gabrièl Feiret . A queste endreit arrenguat en bibliotèca, gràcia a una donacion de l’Associacion La Granja de Solòme e d’En Gèli Grande, grand militant de la causa occitanista, defuntat en ginièr d’aqueste an será l’endreit ont se parla e se canta la Lenga Nòstra .

Lo dimenge 16 d’octòbre, a comptar de 2 oras e mièja , a Constans amb doas pèças de teatre "tener l’estève"e la corala de Montcuc. "viure e cantar".

Lo Dissabte IO de decembre, a 5 oras del ser, a ND de Vèlas un conte / concèrt de Nadal será donat per la corala « cantarem », amb dintrada musicala dels escolans de las escòlas de musica. A 6 oras e mièja Retirada musicala al brandon dusca al Òut e evocacion musicala de la ribièra e de ND de Vèlas. A 7 oras e un quart, a la sala de las fèstas de La Magdalena , Vin Caud seguit d’un repais.
En serada, bal de Nadal.
Joan-Jacme Delmas

trovaretz, çai-jos, 2 videos d’aquelo fèsta..